Er slæmt að selja tónlist?

Undanfarið hefur verið mikið rætt um “sellout” ýmissa tónlistarmanna í auglýsingar.   Ýmsir tala eins og tónlistarmenn eigi helst að borða úr nösunum á sér og spila á litlum krám, annað sé “sellout”  Í Mogganum um helgina var skrifað um andlát pönksins og í dag var upplýst að reynt hefði verið að fá  Ó, Reykjavík í Vodafone auglýsinguna.

Reyndar dettur Óttar Proppé í ótrúlega vörn, eins og þess sé þörf.

Fjölmörg dæmi er um að hljómsveitir sem annað hvort voru ekki frægar eða farnar að kulna hafi náð eyrum nýs hóps áheyrenda með því að selja þær í auglýsingar. 

Sjálfsagt eru margir að heyra Megas í fyrsta skipti af yngri kynslóðinni (fyrir einhverja alvöru).  Það skildi þó ekki vera að hann seldi meira af plötum fyrir vikið!  Jafnvel svo mikið að það bæti margfalt fyrir þá fýlupúka sem kalla hann “sellout”.

Ef ég hefði þá hæfni til þess að skrifa meistaraverk, og væri boðið milljónir fyrir að fá lagið, er einfalt hvað ég hefði ákveðið.

Á hinn bóginn skilur maður menn sem vilja ekki selja lögin sín.  Það er auðvitað þeirra val og ekki mitt að dæma þá.

Nirvana barnið 17 ára

Merkilegt nokk þá verður Nirvana strákurinn af Nevermind 17 eftir nokkra daga.

Led Zepplin að koma saman aftur?

Þessa dagana ganga miklar sögusagnir um að Led Zepplin ætli að koma saman aftur. Sveitin hefur komið saman örfá skipti síðan hljómseitin hætti árið 1980, eftir fráfall trymbilsins John Bonham, meðal annars komu þeir saman á Live Aid árið 1985.

Ástæðan fyrir því að þeir eru sagðir ætla að koma saman er dauði Ahmet Ertegün stofnanda Atlantic útgáfufyrirtæksins, sem kom Led Zeppelin á koppinn, þegar hann fékk þá til list við Atlantic.

Sögunni fylgir að trymbillinn að þessu sinni verði Jason Bonham, sonur Johns, en Jason hefur meðal annars spilað með Jimmy Page. Gangi þessir tónleikar vel ætli þeir að taka “léttan” túr.

Áður hafa gengið sambærilegar sögur um að þeir ætli að koma saman, og aðdáendur sveitarinnar eru fullir efasemda.

Frétt um málið.

Stafrænn Hákon slær í gegn

Umsögn um disk Stafræns Hákons er ein mest lesna grein á virtu bresku óháðu nettímartiti, Angry Ape. Hérna má svo lesa umsögnina.